FASIHI NI NINI

Katika lugha ya Kiswahili kuna mitazamo mbalimbali kuhusu maana ya fasihi na wataalamu mbalimbali wameelezea maana ya fasihi kama ifuatavyo

Wallen na Wallek 1986 wanadai kuwa Fasihi ni jumla ya maandishi yote katika lugha fulani. Wataalamu hawa wanadai kuwa maandishi au machapisho ya aina yoyote ni fasihi.

Hollis Summer 1989 anadai kuwa Fasihi ni maandishi bora au jamii ya kisanaa yenye manufaa ya kudumu. Mtaalamu huyu anadai kuwa maandishi yote yaliyobora ni fasihi, je maandishi yasiyobora sio fasihi?

Kant na Hegel Eagleton 1983 wanadai kuwa fasihi ni sanaa ya lugha yenye ubunifu bila kujali kama imeandikwa au la. Jambo la kujiuliza ni kwamba kama fasihi haijali jambo lililo andikwa au kutoandikwa je maongezi baina ya watu ni fasihi?

Sengo na kiango 1973 katika Hisi zetu wanadai kuwa fasihi ni hisi. Wanadai kuwa mambo yaliyoko kwenye fasihi ni hisia za watu juu ya jambo fulani katika jamii. Mfano ili mwandishi aweze kuandika jambo fulani husukumwa na hisia zinazompelekea  kuandika jambo hilo. Mathalani wasanii wa nyimbo husukumwa na hisi zinazowafanya watunge nyimbo zao.

Kwa ujumla fasihi sanaa ya lugha yenye ubunifu inayofikisha ujumbe kwa jamii na kusawiri vipengele vya maisha, mahusiano na hisi za watu katika muktadha fulani.